Samdráttur í úrgangsmyndun er forgangsmál þegar kemur að hugmyndafræði hringrásarhagkerfis. Mikilvægt er að draga úr myndun úrgangs, og nýta þannig betur aðföng, hvort heldur sem er meðal almennings eða hjá rekstraraðilum

Í bættri nýtingu aðfanga felst bæði almenn hagkvæmni, en einnig aukið sjálfstæði gagnvart innflutningi. Með auknum úrgangsforvörnum má bæði vekja athygli á því hvað betur má fara og byggja sömuleiðis grunn að skilvirku kerfi sem stuðlar að slíkri nýtingu og viðeigandi nýsköpun. Stjórnvöld hafa þegar lagt til stefnur og aðgerðaáætlanir í málaflokknum, bæði heildarstefnu um úrgangsmál og áætlun vegna matarsóunar.

Losun vegna meðhöndlunar úrgangs er að mestu metanlosun vegna urðunar úrgangs. Með því að koma úrgangi í annan farveg en urðun er unnt að draga úr losun, t.d. með því að endurvinna lífúrgang eða með því að koma úrgangi í brennslu

Enn meiri árangur næst með því að minnka magn úrgangs og auka hringrás efna í samfélaginu. Með aukinni flokkun úrgangsstrauma og skilvirkara söfnunarkerfi má tryggja rekstrar¬grundvöll fyrir uppbyggingu brennslustöðva og líforkuvera, sem framleitt gætu hliðarafurðir sem nýtast í orkuskipti samgangna eða í áburðarframleiðslu og þar með aukið samdrátt í samfélagslosun með beinum og óbeinum hætti.

Losun frá skólpi kemur til þar sem skólp fer ómeðhöndlað í viðtaka. Með innviðauppbyggingu í tengslum við fráveitumál sveitarfélaga má auka hreinsun á skólpi og draga þar með úr þeirri losun sem það veldur.

Aukin skilvirkni næst með því að halda úrgangsstraumum aðskildum frá myndun þeirra. Takist vel til að skilja viðkomandi strauma að og lágmarka magn lífræns úrgangs sem endar í fráveitu mætti nýta viðkomandi úrgang til frekari vinnslu og verðmætasköpunar