Losun frá álframleiðslu fellur undir viðskiptakerfi ESB með losunarheimildir (ETS).

Langstærsti hluti losunarinnar verður til við framleiðsluna sökum nauðsynlegra efnaferla en ekki við beinan bruna jarðefnaeldsneytis. Auknum samdrætti verður einungis náð fram með nýsköpun og tækniframförum, bæði við framleiðslu og föngun og förgun losunar. Eftirspurn er eftir vistvænu áli, m.a. fyrir orkuskipti heimsins, og ljóst að takist vel til við samdrátt í losun frá álframleiðslu á Íslandi haldi íslensk álframleiðsla áfram að vera leiðandi á heimsvísu í sjálfbærri framleiðslu áls.

Losun gróðurhúsalofttegunda frá kísil- og kísilmálmiðnaði fellur undir viðskiptakerfi ESB um losunarheimildir.

Losun frá iðnaðinum er bundin í framleiðslutækninni en notkun kolefna er nauðsynlegur hluti efnaferils framleiðslunnar. Sem mótvægisaðgerð má nota lífræn kolefni í auknu magni í stað jarðefniseldsneytis (t.d. kol). Þar sem ekki er hægt að fjarlægja losunina í framleiðsluferlinum þarf að fanga kolefnin sem myndast í útblæstrinum. Þróun slíkrar tækni er hafin en með henni má útiloka nánast alla losun frá kísil- og kísilmálmiðnaði. Kísilmálmur er mikilvægur í framleiðslu loftslagsvænna tæknilausna. Vegna þessa er mikil eftirspurn eftir loftslagsvænni afurð framleiddri með endurnýjanlegri orku og fer vaxandi.