Losun frá mannvirkjagerð kemur til vegna notkunar jarðefnaeldsneytis í tækjabúnaði atvinnutækja á framkvæmdastað og telur 61% af losun smærri iðnaðar. Þau tæki sem keyra því um vegi landsins, þ.e. vörubílar, eru flokkuð undir S.5 Ökutæki og innviðir.

Svo sporna megi gegn losun þessari er til skamms tíma litið mikilvægt að auka orkunýtni, sem eykur samhliða hagkvæmni í rekstri. Í þeim tilfellum sem tækniþróun leyfir þarf þó að ráðast í orkuskipti viðkomandi véla og tækjabúnaðar.

Með losun frá vélum og tækjum er átt við bruna jarðefnaeldsneytis í ýmsum iðnaði utan mannvirkjagerðar og landbúnaðar, sem telur 1% af losun smærri iðnaðar.

Svo sporna megi gegn slíkri losun má ráðast í orkuskipti véla og tækjabúnaðar sem myndu einnig bæta staðbundin loftgæði, vinnuskilyrði þeirra starfsmanna sem við þau starfa og auka hagkvæmni í rekstri viðeigandi búnaðar miðað við núverandi verðlag mismunandi orkugjafa.

Bruni eldsneytis í öðrum smærri iðnaði telur 38% af losun smærri iðnaðar og er m.a. í matvælaiðnaði (án fiskimjölsverksmiðja). Að auki er hér meðtalin losun vegna olíubruna á heimilum.

Unnt er að ýta undir samdrátt með nýtingu endurnýjanlegra orkugjafa í stað jarðefnaeldsneytis.