Flug

Leiðbeiningar um loftslagsvæna samgöngumáta opinberra starfsmanna. Þær skulu stuðla að nýtingu vistvænni ferðamáta og fjarfunda, sem og tryggja samræmi í útreikningum losunar flugs.

Áframhaldandi þátttaka í alþjóðlegum kerfum um samdrátt í losun gróðurhúsalofttegunda frá flugi (ETS og CORSIA) og uppfærsla regluverks eftir þörfum.

Innleiða þrepaskipta kröfu ESB um lágmarkshlutdeild sjálfbærs flugvélaeldsneytis (SAF) fram til ársins 2050, þ.e. 2% árið 2025, 6% árið 2030 og allt að 70% árið 2050.

Skipaður verður vinnuhópur sem kortleggur leiðir til að tryggja nægt aðgengi að vistvænum orkugjöfum, þ.m.t. með fýsileikakönnun innlendrar framleiðslu og hvatakerfa.

Útfæra stuðning stjórnvalda við fyrstu kaup á flugvél sem gengur fyrir endurnýjanlegum orkugjafa í áætlunarflug innan lands í takt við tækniþróun og markaðsforsendur.

Orkuskipti í millilandaflugi gerast ekki án innleiðingar endurnýjanlegs eldsneytis á flugvélar. Orkuskipti í millilandaflugi eru komin af stað á alþjóðavísu og stjórnvöld geta haft áhrif á það hvernig rekstrarumhverfi íslenskra flugrekstraraðila verður á komandi árum. Nýleg skýrsla starfshóps um orkuskipti í flugi, Flugorka framtíðarinnar, tók til skoðunar hvaða leiðir væru færar til að hraða orkuskiptum í flugi og hvort fýsilegt væri að framleiða endurnýjanlegt eldsneyti fyrir millilandaflug hér á landi. Þessi skýrsla er mikilvægt skref í þá átt að móta hér á landi rekstrarumhverfi sem er hagstætt fyrir íslenska flugrekstraraðila til framtíðar.